இந்தத் தகவலை அமெரிக்காவின் சுங்கம் மற்றும் எல்லைப் பாதுகாப்புத் துறையே அளித்துள்ளதுதான் ஹைலைட்! 

இதன்படி கடந்த ஓராண்டில் மட்டும் 90 ஆயிரத்து 415 இந்தியர்கள் சட்டவிரோதமாக அமெரிக்காவிற்குள் நுழைந்து பிடிபட்டுள்ளதாகச் சொல்கிறது. அதாவது ஒரு மணிநேரத்திற்கு பத்து பேர் என்ற கணக்கில் சட்டவிரோதமாக நுழைய முயன்று பிடிபடுவதாகத் தெரிகிறது.

இதில் கூடுதல் தகவல், இந்த எண்ணிக்கையில் பாதிப் பேர் குஜராத்தைச் சேர்ந்தவர்கள் என்பதுதான். முன்பெல்லாம் மெக்ஸிகோ வழியாக சட்டவிரோதமாக நுழைந்தவர்கள், சமீபகாலமாக அதிகளவில் கனடா வழியாக நுழைவதாகச் சுட்டிக்காட்டியுள்ளது அமெரிக்க பாதுகாப்புத் துறை.  அதுமட்டுமல்ல. 

இப்படி அமெரிக்காவிற்குள் சட்டவிரோதமாக நுழையும் நாட்டவர்களில் இந்தியா மூன்றாவது இடத்தைப் பிடித்துள்ளது எனக் குறிப்பிடுகிறது அமெரிக்காவைச் சேர்ந்த பியூ ஆய்வு மையம். முதலிரண்டு இடங்களில் அமெரிக்கா அருகேயுள்ள மெக்ஸிகோ மற்றும் எல் சால்வடார் நாடுகள் உள்ளன. இந்நிலையில் சட்டவிரோதமாகக் குடியேறியவர்களை ஒரு தனி விமானத்தில் திரும்ப அனுப்பியும் வைத்துள்ளது அமெரிக்கா.

பொதுவாக அமெரிக்காவிற்கு விசா மூலம் கல்வி, ஐடி பணி, வணிகம் உள்ளிட்ட விஷயங்களுக்காகச் செல்வதையே நாம் பார்த்துள்ளோம். இப்படி சட்டவிரோதமாக அதிகளவு குடியேற முயல்வதை சில ஆண்டுகளாகவே கேள்விப்படுகிறோம். இதற்குக் காரணம் அமெரிக்கா சென்று வாழும் கனவுதான். 

இது இந்தியர்களுக்கு மட்டுமல்ல. உலகெங்கும் வாழும் அனைத்து மக்களுக்குமே இந்த எண்ணம் இருக்கிறது. அங்குள்ள வாழ்க்கைமுறை, வேலைவாய்ப்புகள், கைநிறைய சம்பளம் உள்ளிட்டவையே அவர்களை அமெரிக்கா நோக்கி ஈர்க்கும் விஷயங்களாக உள்ளன.  

விசா கிடைக்காத இந்தியர்கள் அமெரிக்காவிற்குள் நுழைய இந்த டாங்கி ரூட்டை தேர்ந்தெடுக்கின்றனர். இதற்கு முகாந்திரமாக இருப்பது மெக்ஸிகோ. உலக வரைபடத்தில் அமெரிக்காவின் கீழிருக்கும் நாடு. 

இருந்தும் அவர்கள் நேரடியாக மெக்ஸிகோ செல்வதில்லை.அதற்கும் கீழிருக்கும் பனாமா, குவாத்தமாலா, கோஸ்டா ரிக்கா, எல் சால்டவார் உள்ளிட்ட நாடுகளுக்கு முதலில் செல்கின்றனர். ஏனெனில், இங்கெல்லாம் விசா வாங்குவது எளிது எனச் சொல்லப்படுகிறது. இதுதவிர, பலர் பிரேசில் வழியாக வந்து அங்கே அகதிகளாக இருந்தபடி அமெரிக்காவிற்குள் நுழைவது தனிக்கதை.

இந்தப் பயணத்தின் போது இந்தியர்கள் பிடிபடுவதும், சித்திரவதை செய்யப்படுவதும், சிறையில் அடைக்கப்படுவதும் நடக்கிறது. பல நேரங்களில் இறக்கும் வாய்ப்புகளும் அதிகம். அதாவது உயிரைப் பணயம் வைத்துதான் அமெரிக்காவிற்குள் நுழைய இந்தியர்கள் முயல்கின்றனர்.

இதில் பெண்கள் படும்பாடுதான் சொல்லிமாளாது. அவர்கள் கடத்தல்காரர்களால் அமெரிக்க எல்லையில் தாக்கப்படுவதும், பாலியல் சித்ரவதைக்கு ஆளாக்கப்படுவதும், பாலியல் தொழிலுக்குள் தள்ளப்படுவதும் நடப்பது வாடிக்கை என்கிறது நியூயார்க் டைம்ஸ் பத்திரிகை.

மாஃபியாக்களின் கைகளில் எல்லைகள் இருப்பதால் அவர்கள் வைத்ததுதான் சட்டமாக உள்ளது. இதற்கு 30 வயதான மல்கீத் சிங் நுழைவு ஒரு உதாரணம் என்கிறது ஸ்கை நியூஸ். அமெரிக்காவிற்குச் செல்ல வீட்டுச் சொத்துகளை எல்லாம் விற்று கடத்தல்காரர்களுக்குப் பணம் கொடுத்துள்ளார் அவர். பின்னர் தோகா, இஸ்தான்புல், பனாமா சிட்டி வழியாக எல் சால்வடார் வந்தடைந்தார். 

அதன்பிறகு அவர் என்ன ஆனார் என்பது யாருக்கும் தெரியாது. மூன்று வாரங்களுக்குப் பிறகு அவரின் உடலை அவர் குடும்பத்தினர் சமூகவலைதளம் வழியாக அடையாளம் கண்டு கதறினர். இதேபோல் 45 வயதான சிவ்குமார், தன்னுடைய 19 வயது மகனை இப்போது வரை தேடிக் கொண்டுள்ளார்.