கடந்த மாதம், தேசிய கல்விக் கொள்கையை ஏற்றால்தான் தமிழகத்துக்கு ஒருங்கிணைந்த பள்ளிக் கல்வித் திட்டத்தின் கீழ் நிதி அளிக்கப்படும் என்றார் ஒன்றிய கல்வித்துறை அமைச்சர் தர்மேந்திர பிரதான். இது மும்மொழிக் கொள்கையை வலியுறுத்துகிறது என்பதாலும், இந்தியைத் திணிக்கும் முயற்சி என்பதாலும் கடுமையாகச் சாடியிருந்தார் தமிழக முதல்வர் மு.க.ஸ்டாலின்.

இப்போது தொகுதி மறுசீரமைப்பு மூலம் எட்டு எம்பி தொகுதிகளைக் குறைக்க ஒன்றிய அரசு திட்டமிட்டுள்ளது.

இதுகுறித்து கடந்த வாரம் அமைச்சரவைக் கூட்டத்திற்குப் பிறகு பேசிய முதல்வர் மு.க.ஸ்டாலின், ‘தொகுதி மறுசீரமைப்பு என்ற பெயரில் தென்னிந்தியாவின் தலைக்குமேல் ஒரு கத்தி தொங்கிக் கொண்டிருக்கிறது. இப்போது தமிழ்நாட்டில் 39 நாடாளுமன்றத் தொகுதிகள் இருக்கின்றன. இது குறைக்கப்படும் அபாயம் ஏற்பட்டிருக்கிறது. 

ஒன்றிய அரசு 2026ம் ஆண்டு மக்களவைத் தொகுதிகளின் எண்ணிக்கையை மறுசீரமைப்பு செய்யப் போகிறது. இது மக்கள்தொகையைக் கணக்கிட்டுதான் செய்யப்படும். மக்கள்தொகையைக் கட்டுப்படுத்த வேண்டும் என்பது இந்தியாவின் மிக முக்கியமான இலக்கு. அந்த இலக்கில் நம்முடைய தமிழ்நாடு வெற்றி பெற்றிருக்கிறது.

ஆனால், இப்போது மக்கள்தொகை குறைவாக இருக்கும் காரணத்தால் நாடாளுமன்றத் தொகுதிகளின் எண்ணிக்கையைக் குறைக்க வேண்டிய சூழல் ஏற்பட்டிருக்கிறது. 

நாடு முழுவதும் இருக்கின்ற மக்கள்தொகையின் அடிப்படையில் தொகுதிகளைப் பிரித்தால் தமிழ்நாட்டில் 8 மக்களவைத் தொகுதிகளை இழக்க வேண்டிய சூழ்நிலை ஏற்படும். அதாவது இனி தமிழ்நாட்டுக்கு 39 எம்.பி.க்கள் இருக்கமாட்டார்கள். 31 எம்.பி.க்கள்தான் இருப்பார்கள்.

இந்நிலையில் ஒன்றிய உள்துறை அமைச்சர் அமித்ஷா, ‘தொகுதி மறுசீரமைப்பில் தென்மாநிலங்களுக்கு அநீதி இழைக்கப்படாது. தமிழகத்தில் ஒரு எம்.பி. தொகுதிகூட குறையாது’ என்கிறார். 

ஆனால், இதற்கு பதிலளிக்கும்விதமாக பேசிய கர்நாடக முதல்வர் சித்தராமையா, ‘அமித்ஷா சொல்வதை நம்பமுடியாது’ எனத் தெரிவித்திருக்கிறார். இதனால், தொகுதி மறுசீரமைப்பிற்கு தென்மாநிலங்களில் பலத்த ஆட்சேபணை எழுந்துள்ளது.

இந்திய அரசியலமைப்புச் சட்டத்தின் பிரிவுகள் 82 மற்றும் 170 ஆகியவை தொகுதி மறுசீரமைப்பிற்கான வழிகாட்டுதல்களை வழங்குகின்றன.  

 அதாவது இதில் பிரிவு 82, ஒவ்வொரு தேசிய மக்கள் தொகைக் கணக்கெடுப்புக்குப் பிறகும் (பத்தாண்டுகளுக்கு ஒருமுறை) மக்களவைத் தொகுதிகளின் எல்லைகளையும், எண்ணிக்கையையும் மறுவரையறை செய்வதற்கு நாடாளுமன்றம் ஒரு தொகுதி மறுசீரமைப்பு சட்டத்தை (Delimitation act) நிறைவேற்ற வேண்டும் என்கிறது.

1981ம் ஆண்டு மேற்கொள்ளப்பட்ட மக்கள்தொகைக் கணக்கெடுப்பின்படி மக்களவைத் தொகுதிகள் மறுசீரமைப்பு செய்யப்பட்டிருக்க வேண்டும். ஆனால், அப்படி நடக்கவில்லை. காரணம், 1975ம் ஆண்டு பிரதமர் இந்திரா காந்தி அவசரநிலை யை பிரகடனம் செய்தார்.   அப்போது குடும்பக் கட்டுப்பாடு திட்டத்தையும் தீவிரப்படுத்தினார். 

இதனை சிறப்பாகக் கையாளும் மாநிலங்களின் பிரதிநிதித்துவம் பாதிக்கப்படக்கூடாது என்பதற்காக அரசியலமைப்புச் சட்டத்தில் 42வது திருத்தத்தைக் கொண்டு வந்தார்.

இந்தக் காலவரையறை 2001ல் முடிவுக்கு வந்தது. 

2002ல் தொகுதி மறுசீரமைப்பு ஆணையம் அமைக்கப்பட்டது. அப்போது பிரதமராக இருந்த வாஜ்பாய், தென்மாநிலங்களின் எதிர்ப்பு காரணமாக அரசியலமைப்புச் சட்டத்தில் 84வது திருத்தத்தின் மூலம் இன்னும் 25 ஆண்டுகள் தள்ளி வைத்தார்.அதனால், இந்த ஆணையம் தொகுதிகளை மறுவரையறை செய்தாலும் மக்களவை மற்றும் மாநில சட்டமன்றத் தொகுதிகளின் எண்ணிக்கைகளில் எந்த மாற்றமும் செய்யவில்லை.

இந்நிலையில் 2026ம் ஆண்டு தொகுதி மறுசீரமைப்பு செய்யப்பட வேண்டும். இதற்கு ஏற்பதான் கடந்த 2024ம் ஆண்டு மக்களவைத் தேர்தலுக்குப் பிறகு ஒன்றிய உள்துறை அமைச்சர் அமித்ஷா, ‘எங்கள்முன் தேசிய மக்கள்தொகைக் கணக்கெடுப்பு மற்றும் தொகுதி மறுசீரமைப்பு எனும் இரண்டு பெரும் வேலைகள் உள்ளன’ எனத் தெரிவித்தார். 

ஆனால், இதற்குமுன் 2023ம் ஆண்டு புதிய நாடாளுமன்றக் கட்டடம் திறக்கப்படும்போதே தொகுதி மறுசீரமைப்பு குறித்து கருத்துகள் வந்தன. ஏனெனில், புதிய நாடாளுமன்றக் கட்டடத்தில் மக்களவை உறுப்பினர்களுக்கான இருக்கைகள் 888 ஆகவும், மாநிலங்களவை உறுப்பினர்களின் இருக்கைகள் 384 ஆகவும் அமைக்கப்பட்டிருந்ததுதான்.   

அப்போது பேசிய பிரதமர் மோடியும், ‘‘புதிய நாடாளுமன்றம் காலத்தின் தேவை. வரும் காலங்களில் எம்.பிக்களின் எண்ணிக்கை அதிகரிப்பதை நாம் பார்க்கவிருக்கிறோம்’’ எனக் குறிப்பிட்டார்.

அவர், ‘‘கடந்த 50 ஆண்டுகளில் தென்மாநிலங்கள் பயனுள்ள நடவடிக்கைகள் மூலம் மக்கள்தொகையைக் கட்டுப்படுத்தியது மட்டுமில்லாமல் வளர்ச்சிப் பாதையிலும் முன்னேறியுள்ளன. ஆனால், உத்தரப்பிரதேசம், பீகார், மத்தியப் பிரதேசம் போன்ற வடமாநிலங்கள் மக்கள்தொகையைக் கட்டுப்படுத்துவதில் முற்றிலும் தோல்வியடைந்தது மட்டுமில்லாமல் வளர்ச்சிப் பாதையிலும் தள்ளாடுகின்றன.

எனவே 2026ல் நடத்தப்படும் மக்கள்தொகைக் கணக்கெடுப்பில் இருந்து பெறப்படும் மக்கள்தொகை விகிதத்தின் அடிப்படையில் தொகுதிகள் மறுவரையறை மேற்கொள்ளப்பட்டால் மக்கள் தொகை உயர்வை கட்டுப்படுத்திய தென்மாநிலங்களின் மக்களவைத் தொகுதிகளின் எண்ணிக்கை குறையும். வடமாநிலங்களின் தொகுதிகள் அதிகரிக்கும்.

வரிப்பகிர்வு, ஜிஎஸ்டியில் அநீதி, இயற்கைப் பேரிடர் நிவாரணம், அரசுக்கு முள்ளாகத் திகழும் புதிய கல்விக்கொள்கை, யுஜிசி விதிமுறைகளில் திருத்தம் என ஒன்றிய அரசின் ஒவ்வொரு நடவடிக்கையும் தீய நோக்கம் கோண்டது. 

இதற்கு எதிராக தேசிய அளவில் குரல் எழுப்பும் தென்மாநிலங்களின் குரலை மேலும் வலுவிழக்கச் செய்யும் நடவடிக்கையாகவே இப்போது தொகுதி மறுசீரமைப்பு என்ற புதிய ஆயுதத்தைக் கையில் எடுத்துள்ளது’’ எனக் காட்டமாகத் தெரிவித்துள்ளார்.

இதுமட்டுமல்ல. அமித்ஷா சொல்வதுபோல தென்மாநிலங்களின் தொகுதிகள் குறையாது என்றே வைத்துக்கொண்டாலும், வடமாநிலங்களில் மக்கள்தொகைக்கு ஏற்ப தொகுதிகளை அதிகரித்தால் அதுவும் அநீதிதான். ஏனெனில், வடமாநிலங்களின் பிரதிநிதித்துவம் அதிகரிக்கும். தென்மாநிலங்களின் பிரதிநிதித்துவம் குறையும். 

இதனால், எந்த விஷயத்திற்கும் தென்மாநிலங்களால் குரல் எழுப்பமுடியாமல் போகும். இதனாலேயே தமிழகம் உட்பட தென்மாநிலங்கள் தொகுதி மறுசீரமைப்பிற்கு எதிராக பலத்த குரல் எழுப்பத் தொடங்கியுள்ளன.